Un home de 54 anos e natural de Lugo faleceu tras chocar o coche no que viaxaba contra unha de varias vacas que accederan á Autovía do Cantábrico (A-8), á altura da localidade cántabra de Quijas, mentres que o outro ocupante resultou ferido grave.
O accidente produciuse ás 23.45 horas, despois de que quince minutos antes a Dirección Xeral de Tráfico recibise o aviso, a través dunha chamada, da presenza de varias reses na calzada da autovía. O vehículo que viaxaba en dirección a Asturias e Galicia chocou contra un dos animais que se atopaban na calzada e un dos seus ocupantes resultou morto e o outro ferido grave.
Segundo informan en nota de prensa a Delegación do Goberno en Cantabria e o servizo de urxencias 112 do Goberno de Cantabria, crese que as vacas accederon á autovía polo enlace de Quijas. O falecido morreu no acto e o ferido grave foi trasladado nunha Uvi móbil do 061 ata o hospital.
Ambos tiveron que se excarcerados do coche polos bombeiros de Torrelavega, mentres que os do 112 ocupábanse de retirar o animal co que chocara o vehículo que se atopaba debaixo deste. A Dirección Xeral de Tráfico, que cortou uns minutos a autovía e despois habilitou un carril para o paso, avisa que nos paneis informativos da A-8 manterase unha advertencia aos usuarios sobre a presenza de posibles animais na calzada.
