Un home de 92 anos de idade faleceu este sábado en Foz ao saírse da vía na antiga estrada de San Martiño e caer por un terraplén duns cinco metros. O accidente produciuse arredor das doce menos cuarto da mañá.
O GES de Cervo excarcerou ao finado e subiuno ata a estrada nun taboleiro, onde quedou tapado á espera da chegada do forense para que cerfique o falecemento, aínda que persoal do servizo de Urxencias Médicas 061 desprazado á zona comprobou que non tiña constantes vitais.
A Garda Civil de Tráfico, Protección Civil e a Policía Local tamén interviñeron neste sinistro.
Doutra banda, a estrada que conecta Foz con Ferreira, á altura de Santa Cilla, rexistrou outro contratempo, no que un coche saíu da vía e encaixouse contra un poste da luz. No vehículo viaxaba unha parella, que non quedou atrapada e foi evacuada ao Hospital da Mariña por unha ambulancia do 061.
Os bombeiros de Barreiros acudiron a este sinistro, pero non foi necesaria a súa actuación. Tamén participaron a Garda Civil de Tráfico e Protección Civil de Foz.
