Un veciño de Portomarín duns 50 anos faleceu este mércores tras verse implicado nun aparatoso accidente na N-547, no termo municipal de Arzúa.
Outra persoa resultou ferida tras chocar dous turismos que circulaban pola estrada que une Santiago e Lugo moi preto da parroquia de Boente.
Segundo informou o 112 Galicia, ata o lugar desprazáronse os Bombeiros de Arzúa, que tiveron que excarcerar a un dos feridos ao quedar atrapado no interior dun dos turismos.
Así mesmo, para evacuar ao outro ferido e a pesar de que non estaba atrapado, foi necesaria a intervención de profesionais de extinción, que sacaron á persoa pola parte de atrás do vehículo. Segundo concretaron os Bombeiros ao 112 Galicia, o ocupante do outro vehículo implicado resultou ileso.
O accidente rexistrouse ao redor das 20.15 horas deste mércores. A partir de aí, informouse, ademais de aos servizos sanitarios e aos bombeiros, aos axentes de Tráfico, Policía Local e aos efectivos de Protección Civil da localidade. Ademais, debido á gravidade da situación, os sanitarios confirmaron ao 112 Galicia da saída dun helicóptero medicalizado do 061. O veciño de Portomarín foi evacuado aínda con vida nunha ambulancia, pero finalmente faleceu.
