Dúas persoas faleceron e outra resultou ferida de gravidade na noite deste luns nunha colisión frontal entre dous vehículos no corredor Nadela-Monforte.
No accidente víronse implicados un Fiat Punto que circulaba en dirección Monforte e un Opel Corsa que viaxaba en sentido contrario e que resultou calcinado.
Os feitos ocorreron pouco antes das dez da noite no quilómetro 15,100 da vía, á altura da saída do municipio do Páramo, preto da saída do Páramo e A Pobra de San Xiao.
Unha das vítimas mortais é un home, condutor do Fiat Punto. O outro falecido, ocupante do Opel Corsa, está pendente de identificación. No Fiat Punto viaxaba tamén unha muller, que foi trasladada con feridas moi graves ao Hula.
O accidente mobilizou aos axentes da Garda Civil de Tráfico e os bombeiros do parque comarcal de Sarria, entre outros efectivos.
