Medio milleiro de persoas sumáronse este luns a unha concentración convocada ante o centro cívico do barrio ferrolán de Caranza en solidariedade coa familia de Marta Sequeiro, camareira asasinada nun bar das proximidades o pasado mes de abril. Os asistentes, entre eles edís da corporación municipal, permaneceron ante o inmoble durante preto de media hora pedindo "xustiza para Marta".
Consignas relativas ao caso permanecen nas vidreiras do edificio, onde se recollen firmas de apoio aos seus achegados. A propia familia asegurou no acto que xa superaron as 3.000 rúbricas.
Pancartas en recordo de Sequeiro protagonizaron un evento sobrio, no que unicamente mostras espontáneas dalgúns participantes romperon o silencio. Mercedes Leal, da asociación de mulleres de Caranza, agradeceu a presenza dos congregados para que se profunde na resolución do crime e "non sexa o que pretende o fiscal", que no seu escrito de cualificación descarta aleivosía ou asañamento. Con todo, a familia escúdase na autopsia, que reflicte que a camareira recibiu 64 puñaladas, 21 delas na súa cara, e reclama que se xulgue doutro xeito". Así, anunciou que as firmas que se recompilan estes días enviaranse á Fiscalía por considerar que "é unha inxustiza o que queren facer".
Yolanda Sequeiro, irmá da asasinada: "Queremos que se faga xustiza, 64 puñaladas é un asañamento"
Os interesados en sumar a súa rúbrica poden acudir ao propio centro cívico de Caranza ou á Casa da Muller, no centro histórico de Ferrol, aínda que tamén se pretende estender a iniciativa a locais comerciais da zona. Leal engadiu que no último Consello Sectorial da Muller da cidade naval transcenderon "bastantes propostas" para continuar co respaldo aos máis próximos a Marta Sequeiro e seguir "loitando ata que se faga xustiza".
A representante veciñal sinalou que "cada día están a matar a máis mulleres" e que se "con 64 puñaladas non é asañamento isto non é xustiza". Ante a argumentación da defensa do acusado, que esgrime que inxerira alcol e ansiolíticos, Mercedes Leal dixo: "Non sabía o que facía; non mo creo". Para rematar, esixiu que se cumpran as leis para todas".
Visiblemente emocionada, Yolanda Sequeiro, unha das irmás da asasinada, encomiou o "apoio" cidadán: "Seguimos dicindo que queremos que se faga xustiza, 64 puñaladas é un asañamento".
