Miriam Saavedra, exparella de Carlos Lozano, sorprendeu este domingo a Carlos Lozano na Festa Gastronómica do Galo de Curral de Vila de Cruces, onde o presentador deu o pregón.
A moza, que ía acompañada dun equipo do programa Sálvame, de Telecinco, apareceu disfrazada de galo e terminou chorando –como se pode ver no seguinte vídeo, de Patri Figueiras–.
Pero esa non foi a única sorpresa do día. E é que un dos veciños máis ilustres de Vila de Cruces, David Sueiro, tamén reclamou a súa cota de protagonismo.
O concursante de Granjero busca esposa subiuse ao escenario ao final do pregón xunto a Patricia Lorenzo, a muller que coñeceu no espazo televisivo, para anunciar o seu próximo enlace matrimonial. Ademais a voda celebrarase na localidade cruceña.
Para acabar o discurso da festa o alcalde, Jesús Otero, quixo agradecer ás autoridades e aos seus veciños o labor de exaltación do galo de curral, mentres que Carlos Lozano puxo a guinda ao porse a disposición de todos os asistentes, iso si, antes de empezar a consumir alcol. "Moitas grazas a todos. Comigo o que queirades, pero que sexa antes de empezar a beber, porque aí xa non falamos", dixo o presentador –como se pode ver neste vídeo de Cristina Mosteiro–.
A Festa do Galo de Curral tamén contou coa participación de Isabel Risco, como presentadora, e de Merche, que ofreceu unha actuación para todas as persoas que se animaron a acudir á cita gastronómica.
