O presidente da Xunta, Alberto Núñez Feijóo, defendeu a oportunidade de viaxar a Israel para identificar os factores que o converteron nun referente do emprendemento tecnolóxico e para buscar formas de implantalos en Galicia. Núñez Feijóo concluíu este xoves a súa viaxe oficial de tres días a Israel coa participación no foro de investimento de micromecenazgo OurCrowd, acompañado pola delegación de empresarios galegos que acudiu á viaxe, e despois fixo unha parada no Museo do Holocausto, Yad Vashem, en Xerusalén.
En declaracións aos xornalistas, sinalou que o resultado da viaxe foi "bo" e destacou que Israel é un país do que aprender, "que sabe apostar pola tecnoloxía, sabe investir e sabe esperar a que as ideas vaian madurando" e exemplifica un modelo polo que Galicia quere transitar, no que empresas, centros de coñecemento e administración van da man.
Durante a súa viaxe, que comezou en Tel-Aviv o pasado martes, e continuou este mércores e este xoves en Xerusalén, o presidente galego e o conselleiro de Economía, Francisco Conde, estiveron acompañados por unha vintena de empresas, clústers e centros tecnolóxicos galegos que acudiron en misión comercial a Israel, un dos países que máis inviste en innovación.
E é que segundo incide a Xunta, o 45% do PIB do país está composto por industrias de alta tecnoloxía en sectores como o aeronáutico, as telecomunicacións ou a biotecnoloxía; sectores nos que Galicia está interesada e son algúns nos que a delegación comercial galega centrou os seus traballos comerciais estes días.
Ademais, a delegación galega puido presentar o traballo que desenvolven algúns dos seus sectores estratéxicos e a administración incidiu na rede de apoio ao emprendemento innovador, con especial énfase no Plan Innova 2020, un instrumento polo que a Xunta pretende destinar 1.775 millóns ata o ano 2020.
"En definitiva, imos seguir traballando. As pontes de contacto están feitas e Galicia é unha terra aberta ás ideas, ao capital risco e ao investimento produtivo", afirmou Núñez Feijoó, que asegurou que Galicia "seguirá apostando por este modelo", no que as empresas, os centros de coñecemento e a administración van da man.
Na última xornada da viaxe, Núñez Feijóo e a delegación galega participaron na feira OurCrowd Global Investors Summit, unha convocatoria de referencia mundial no capital risco na que se citan investidores de todo o mundo e empresas de base tecnolóxica de recente creación (startups) e na que Galicia agarda establecer "colaboración e alianzas estratéxicas".
"Estamos a falar dun evento que rolda os 7.000 asistentes procedentes de máis de 80 países no que case 100 startups presentan os seus proxectos. Por tanto, este foro é un lugar que a Galicia lle interesa desde o punto de vista económico e tecnolóxico", destacou.
Tras a participación neste foro, Núñez Feijóo, acompañado polo conselleiro de Economía, Francisco Conde, e do embaixador de España en Israel, Manuel Gómez-Acivro, fixo unha visita protocolaria ao Museo do Holocausto (Yad Vashem), onde fixeron unha ofrenda floral e deixou unha dedicatoria para mostrar o apoio do pobo galego e lembrar os maiores crimes de historia da Humanidade e render homenaxe ás vítimas.
