O presidente da Xunta e do PPdeG, Alberto Núñez Feijóo, encomiou este domingo a orixe do seu partido, o PP, que naceu no pobo e expandiuse, fronte a esas orixes en grandes cidades, como Madrid e Barcelona, e a un crecemento estilo "franquías de McDonald's" doutras formacións.
Nun mitin-xanto celebrado na parroquia rural de Nemenzo, en Compostela, ante un milleiro de persoas, o líder dos populares galegos incidiu nesta idea para remarcar que "nós nacemos onde hai que nacer", e como os carballos, con raíces "sólidas", así como coa Constitución, a liberdade e a democracia por diante, enumerou.
Estes tres alicerces, proseguiu, foron respectados polo fundador, o falecido Manuel Fraga, así como por José María Aznar, Mariano Rajoy e o actuar líder e candidato á Presidencia de España, Pablo Casado, nas súas respectivas ocupacións, polo que o 28A só atisba, polo ben do seu país, dixo Núñez Feijóo, que a persoa que estea á fronte pertenza a estas siglas.
Só hai "dous posibles", o socialista Pedro Sánchez que "como xa queda moi pouco do PSOE -ironizou- diriamos que é o candidato de Pedro Sánchez" e Pablo Casado, "español, igual que nós, e a moita honra" e alguén que unicamente se debe aos españois, "a ninguén máis". Ao contrario que Sánchez, argumentou, posto que no seu discurso afirmou que é un aspirante que serve a Podemos, aos independentistas cataláns porque "mirará para outro lado" e a "Batasuna-Bildu".
Nunha campaña que Núñez Feijóo ve moi "interesante", fixo este domingo unha diferenciación entre os que cren que van primeiros, polo PSOE, e os "humildes", os do PP, pero apuntou que máis aló das sondaxes, incluso dos "pagos con fondos públicos" tal e como matizou, a maioría, que é a que manda nas urnas, non quere a Sánchez e, se así é, pois "non gobernará".
Subliñou que ao socialista o que lle interesa é esa división do voto, pois canta máis, maiores posibilidades obtén segundo as súas "contas", e por iso reclamou concentrar as papeletas no PP. "Se queren que gañe Pedro Sánchez", a vía é votar a todos, e no caso de que este non sexa o desexo, só hai unha, "o PP, non hai máis", algo que tachou Feijóo de evidencia "política, evidencia electoral".
Da súa forza política manifestou que se preocupa por Alcoa, por Ence, pola AP-9 e polo superávit, así como polo Xacobeo, pois o de 2021 debe ser "o mellor da historia" nunha terra á que o Apóstolo Santiago "decidiu vir repousar para"sempre , algo do que ninguén pode presumir, e por iso a definición do "berce de Occidente", relatou.
Para ese Ano Santo conta con Pablo Casado, que, do mesmo xeito que Núñez Feijóo non necesita que ninguén lle dea o carné de galego, en alusión aos nacionalistas, pois tampouco este candidato precisa o de "español" por parte de Vox e Ciudadanos, e el tampouco, asegurou.
A Pablo Casado describiuno como "castelán de verdade, dunha peza", pero non así a un expresidente español, José Luis Rodríguez Zapatero (PSOE), do que rememorou que na súa etapa non colaborou co Ano Santo, mentres que Mariano Rajoy en tempos duros para a economía estivo para a maior rehabilitación da Catedral nos seus anos de historia. É só un exemplo, expuxo Feijóo, pero o 28A "xogámonos moito" así que "moito ánimo, adiante, a seguir e a gañar", aconsellou.
