O presidente da Xunta e do PP de Galicia, Alberto Núñez Feijóo, volveu reclamar o apoio de quen optaron nas xerais por Vox e por Ciudadanos, e expuxo que de aglutinar todo o voto "contra" Pedro Sánchez hoxe "estariamos ante unha España diferente, impresionante".
Nun mitin para apoiar a Alejandro Lorenzo, candidato á alcaldía do Porriño, Feijóo proclamou que os dez millóns de votos "en contra" de que Sánchez fose presidente terían hoxe a maioría absoluta nas Cortes "e estariamos a falar da recuperación económica e da creación de emprego". "Estariamos a falar dunha España distinta, dunha España impresionante", proclamou Feijóo, convencido de que "a maioría" de votantes de Vox e Ciudadanos "preferirían a un presidente do PP" e agora saben que a división de votos entre os partidos de dereita para o Senado era unha "falacia" e unha "proposta deshonesta".
Feijóo tamén lanzou os seus dardos contra Pedro Sánchez e o seu partido, e ironizou con que "agora resulta que o PSOE din que está de moda", cando "nos deixou 6 millóns de parados" e a unha "España en concurso de acredores", e fixo aos españois pasar o verán de 2012 falando da prima de risco. "E agora resulta que o futuro de España é volver ao pasado, ás mentiras, ao paro masivo, a unha España empobrecida que sabía que cada vez era máis difícil chegar a fin de mes", proclamou.
Atacou a Pedro Sánchez por "ocultar" con quen vai pactar e deu por sentado que o fará, tras o 26-M, con quen o apoiaron na moción de censura contra Mariano Rajoy, máis aló do "señuelo" do veto do parlamento catalán á designación como senador de Miquel Iceta para que poida presidir a Cámara Alta.
Feijóo expuxo se "hai algún galego" ao que lle interese ou vaian beneficiar as leis que poidan aprobar ou apoiar Podemos e forzas nacionalistas e independentistas, e contestou que a ninguén salvo ao BNG, que vai en coalición nas eleccións europeas con ERC e Bildu. Fixo alusión á detención do histórico dirixente de ETA Yosu Ternera e expúxose como en Galicia se pode "pedir o voto para Bildu e ERC en nome dos nacionalistas galegos".
En clave local, reivindicou o voto "transparente" ao PP, porque "sabemos onde vai parar", e preveu de que, "tanto monta, monta tanto, PSOE, BNG, Mareas, que Mareas, BNG e PSOE (...) pero o produto é exactamente igual". Garantiu que os populares non van gobernar con nacionalistas, porque "piden un voto para Batasuna e ERC", nin queren a ningún alcalde que sexa "subalterno" do de Vigo, en alusión á rexedora do Porriño, Eva García de la Torre, quen "non pode facer nada sen a autorización" de Abel Caballero.
