Un operario resultou ferido de consideración este mércores nun accidente laboral rexistrado cando realizaba o seu traballo nunhas obras do Mosteiro do concello ourensán de Montederramo.
Segundo informou o 112 Galicia, sobre as 12,00 horas, unha persoa particular contactou co servizo de urxencias para solicitar asistencia sanitaria urxente para un traballador ferido, despois de caer do volquete que manexaba por un desnivel.
Por iso, o Centro Integrado de Atención ás Emerxencias (CIAE) 112 Galicia requiriu a intervención de persoal sanitario que, tras valorar a situación, mobilizou o helicóptero medicalizado con base en Ourense. De igual xeito, solicitaron a colaboración dos membros do GES de Castro Caldelas e de axentes da Garda Civil.
Urxencias Sanitarias de Galicia-061, ademais do helicóptero medicalizado con base en Ourense, mobilizou unha ambulancia asistencial e o equipo sanitario de Atención Primaria de Montederramo.
Finalmente o home ferido, C.S.S., de 52 anos de idade, foi trasladado polo helicóptero do 061 con base en Ourense ao Complexo Hospitalario Universitario de Ourense (CHUO), confirmaron a Europa Press fontes sanitarias.
