A filla da muller asasinada presuntamente polo seu marido en Cabana de Bergantiños, Ana Belén Varela, publicou este mércores unha carta nas redes sociais na que, dirixíndose á súa nai, pide a "pena máxima" polo crime e recorda a súa fortaleza: "Forte eras, iso ninguén o pode negar, que ata para matarte o tiveron que facer por detrás".
"Imaxínome que coa firmeza dos teus ollos, o pulso tremeríalle demasiado como para empuñar unha arma", escribe a moza, que pide "pena máxima" tras o crime, porque "ninguén, nin sequera un pai, ten o dereito de quitarme o que máis quería no mundo, o que máis necesitaba".
Así, a filla da muller asasinada recorda que nela vía "a unha nai e a unha gran amiga", á "súa confidente", e agradécelle ser o seu "claro exemplo a seguir". "Pero o teu gran defecto foi fiarte de quen non debías e ti sabíalo. Vinte caer e levantarte en situacións nas que outros non podían", sinala, tras o que engade que o pasado domingo, tras recibir tres disparos perpetrados supostamente polo seu marido, "foi a única vez que non te vin levantarte".
"Que ironía, as veces que che gritaba polo moito que fumabas, e ao final o cancro tíñalo na cama e non nos pulmóns", continúa a misiva.
UN EXEMPLO CONTRA A VIOLENCIA DE XÉNERO. Na súa carta, a filla da vítima pídelle simbólicamente que se converta nun "exemplo tamén para toda España, para todo o mundo, para todas as mulleres".
"Porque me nego a que todo isto pase en balde, necesito que non sexas unha máis, se non que sexas ela, a que conciencie, a que quite vendas, a que motive, a que faga entender que hai que actuar XA, porque o que hoxe é unha ameaza sen credibilidade, mañá é unha noticia tras unha pantalla", indica a moza, que pide "tolerancia cero" e di ás mulleres vítimas: "Esperta, móvete!".
"Belén, fuches vítima do teu propio marido e agora tócache dicirlles a todas as que o necesiten que teñen que actuar por e para elas, e non só facer o que todo o mundo espera que fagan", engade a filla da asasinada, que recorda que "non hai unha lei que prohiba buscar a túa propia felicidade". "O teu sabías onde estaba a túa, pero esperaches demasiado a ir buscala", destaca, para finalizar a carta agradecendo o seu papel de nai.
