A menos de tres semanas para o Desembarco Viquingo, o municipio de Catoira xa se prepara as súas festas grandes, que este ano contarán con dúas novidades.
Unha delas é a substitución da clásica obra teatral pola representación do roadshow Follow the vikings. O espectáculo, que pretende enxalzar a cultura viquinga mediante a combinación da dramatización con elementos musicais e a danza, poderá verse os días 2 e 3 de agosto, ás 22.30 horas, no recinto das Torres de Oeste.
A segunda novidade é a celebración, na Alameda, do concerto de Roi Casal. Será ás 22.30 horas do domingo 5.
Outros dos eventos máis destacados desta edición son a charla Viquingos do norte, de Andreas Forsgren, que se celebrará nunha das salas do Edificio Multiusos, ás 20.00 horas do día 3 de agosto, e a III Regata Memorandum Felipe Aragunde, que se desenvolverá a partir das 11.30 do día 4 no río Ulla.
Nesta mesma xornada celebrarase a habitual cea viquinga, no recinto das Torres de Oeste, co posterior espectáculo Noite de luz e os concertos de Versión B, Falperrys, Liska! e Baiuca, na praia fluvial.
O 5 de agosto, a xornada do multitudinario e festivo desembarco, programado para as 13.00 horas, estará amenizada por diversas actuacións, entras as que figuran as dos grupos Troula Animación e Os Gascones.
"Este espectáculo vai brillar máis que noutros sitios onde xa se fixo"
O alcalde de Catoira, Alberto García, considera que a Romaría Viquinga é un evento de referencia internacional e que o seu impacto é tal que serviu de inspiración para proxectos como os de Follow the vikings.
O rexedor afirma que algúns costumes do municipio foron utilizadas na realización deste roadshow. "Nós estamos facendo cousas tan interesantes como noutros sitios, e incluso chegamos a achegar a este espectáculo elementos que se poden ver na súa escenificación".
Neste sentido, móstrase optimista coa chegada da mostra internacional, e considera que esta vai "lucir moito mellor aquí, polo emprazamento". García agregou que "eu vino en Dublin, diante dun xardín xunto ao Concello, e ese lugar non ten as características naturais do recinto das Torres de Oeste".
O alcalde expresou a súa confianza que "en Catoira vai brillar máis que nos sitios nos que se representou ata agora".
