O frade do Cebreiro acusado de abusos sexuais asegurou este martes no xuízo que se celebra en Lugo que non sabía que a moza era menor porque non o parecía nin polo físico nin pola vida que levaba, "moi independente". Así mesmo, negou que ocorrese nada co curmán discapacitado da moza.
Os feitos remóntanse ao ano 2014, cando supostamente este home, que pertencía naquel entón á orde franciscana, contactou por primeira vez coa adolescente, que tiña 16 anos, a través dunha rede social. O home relatou os feitos: foise coa menor e o seu irmán a Trives, á súa casa familiar (do frade). Ese día entrou na habitación dela, púxolle unha man na perna e non pasou nada máis.
Segundo o escrito de acusación do ministerio público, posteriormente, entre novembro de 2014 e febreiro de 2015, mantiveron varios encontros sexuais e o acusado logrou convencer á nena para que un curmán seu, de 20 anos, os acompañase, aínda que finalmente non chegou a manter relacións con el.
No transcurso da súa declaración, sinalou que foi a moza a que o buscou a el, porque se presentaba "todos os días no Santuario" do Cebreiro, acompañada do seu irmán, para ofrecerlle a súa axuda con algúns dos traballos que tiña que realizar.
O home dixo que a primeira relación sexual completa tivérona na sancristía porque el tiña lumbalxia e ela ofreceuse a facerlle unha masaxe.
Acabaron tendo relacións, "pero non fun eu o que empecei", di. Logo tiveron relacións máis veces na casa de Trives e na sancristía da parroquia do Cebreiro.
Recoñece que empezaron unha relación as fins de semana, "pero eu non era a única persoa que estaba con ela, quedaba con máis persoas as fins de semana".
No xuízo ensináronlle fotos coa menor en situacións sexuais, ambos con billetes nos seus órganos sexuais. Di que a idea de facer fotos foi del, “pero despois ela afeccionouse e mandáballe fotos a máis xente”.
DEPRESIÓN. "Sei que esta situación non é perdonable pero caín nela porque estaba nunha terrible depresión. Perdín o norte e deixeime levar, sen saber con quen me estaba deixando levar. Porque logo xa me dixeron que non era xente de fiar", asegurou o acusado.
Ademais da pena de cárcere, o ministerio público tamén esixe para o acusado a prohibición de achegarse ás vítimas -durante 12 e 3 anos respectivamente-, así como que indemnice á moza con 9.000 euros e ao seu curmán con 2.000. O frade, que chegou a estar encarcerado durante máis dun mes en 2015, sempre mantivo, como ocorreu agora en sala, que as relacións que se xulgan foron consentidas.
