A chegada dunha fronte fría o pasado domingo deixará, polo menos ata o xoves, precipitacións, baixas temperaturas, vento e algunhas nevadas.
A comunidade, que xa estivo en alerta laranxa este domingo e luns, volverá activar o aviso por risco este martes por mor da choiva no oeste e dos fortes ventos no litoral atlántico e as zonas altas do interior.
Así, a alerta amarela activarase a partir das 12.00 horas na Mariña e o litoral coruñés, por refachos de vento superiores aos 80 quilómetros por hora, motivo que estenderá o risco ata a montaña de Ourense (a partir das 15.00 horas), o sur e o noroeste de Ourense, a montaña e o centro de Lugo e o interior da Coruña (ás 18.00 horas). O aviso será por ventos do suroeste, de forza sete, no mar da Coruña e Pontevedra a partir das 9.00 horas.
O suroeste da Coruña e o interior da provincia de Pontevedra tamén estará en risco por precipitacións que poderían deixar máis de 40 litros por metro cadrado en 12 horas, segundo a previsión de Meteogalicia.
MÉRCORES DE NEVE. A xornada do mércores estará marcada polas precipitacións xeneralizadas, que poden deixar neve a 1.300 metros nas montañas de Lugo e Ourense durante as primeiras horas. Xa a partir das 14.00 horas, a cota baixará aos 1.100 metros para terminar o día situada nos 900. A partir das 14.00 horas do xoves, Meteogalicia prevé que volva nevar a 1.100 metros nas provincias de Lugo e Ourense.
As temperaturas, pola súa banda, oscilarán este martes entre os seis graos de mínima que se esperan en Lugo e os 18 de máxima que poden alcanzar en Ourense e Ferrol. Para o mércores e o xoves espérase que se produza un lixeiro descenso das máximas, que variarán entre os 12 e os 16 graos, mentres que os valores mínimos non rexistrarán grandes cambios.
