O Club de Fútbol Fuenlabrada anunciou este sábado doce novos contaxios ata sumar un total de 28 positivos no equipo. Catro deles foron localizados en Madrid e non tiveron ningún contacto desde o partido ante o Elxe disputado o pasado 17 de xullo.
Os outros oito novos casos levan dando negativo desde o sábado 18 e, "pasado oito días e a pesar de estar illados nas súas habitacións os últimos seis, hoxe os resultados deron positivo".
Ademais entre os doce novos casos había dúas persoas con anticorpos ao pasar xa a enfermidade e, con todo, deron positivo neste último test. Unido a que dous contactos estreitos do CF Fuenlabrada tamén deron positivo.
O Fuenlabrada indica que o xogador hospitalizado segue ingresado, estable e con sintomatoloxía non grave derivada da Covid-19.
O club expresa nun comunicado a súa "profunda dor e preocupación polos resultados do últimos test PCR realizados, que sinalan un total de 28 positivos no CF Fuenlabrada". "Estamos a avaliar as medidas a tomar ante a situación que estamos a vivir e no día de hoxe iniciaremos os contactos coa liga", sinalaron.