Galicia rexistra 2.939 casos activos de covid-19, 64 máis que o día anterior, cifras similares ao pasado 12 de marzo, nunha xornada na que se rexistraron 253 contaxios novos, 33 máis que 24 horas antes.
Segundo os datos difundidos polo Servizo Galego de Saúde, ata as 18:00 horas do xoves había nas unidades de críticos dos hospitais galegos 43 pacientes (dous máis); mentres que nas habitacións hai ingresados 156 pacientes de covid-19, sete menos.
Desde o inicio da pandemia contaxiáronse en Galicia 120.811 persoas, curáronse 115.516 e faleceron 2.379; unha das cales foi notificada nas últimas horas.
Ademais, realizáronse 1.991.891 probas PCR, 8.352 na última xornada, cunha taxa de positividade do 2,7 %, e outras 2.241 serolóxicas, que elevan o número destas probas a 892.844.
Por áreas sanitarias, Vigo continúa á alza, con 823 casos, 34 máis que o día anterior e 82 contaxios novos por PCR; seguida da Coruña, que volve superar os 700 casos activos (728), tras sumar 29 novos nas últimas 24 horas e detectar 65 contaxios por PCR.
O resto de áreas manteñen tamén a lixeira tendencia á alza dos últimos días, salvo a de Santiago de Compostela, que continúa baixando, outros once casos activos menos, e a de Lugo, que baixa un caso.
