Galicia continúa o descenso da terceira onda do coronavirus e na última xornada as cifras de ingresos en Uci xa se situaron por baixo do pico da primeira onda, alcanzado en abril do ano pasado, con 169 pacientes, fronte aos 178 de entón.
Logo de alcanzar o pasado 8 de febreiro, o pico da terceira onda de ingresados en unidades de críticos, con 254 persoas, as cifras fóronse reducindo e, segundo os datos do Servizo Galego de Saúde (Sergas) das 18 horas deste xoves, hai xa 11 persoas menos nas Uci galegas que o mércores.
A presión asistencial rebaixouse en xeral, ao haber 813 persoas ingresadas nos hospitais galegos, 50 menos, das cales 39 altas corresponden aos pacientes en planta, que pasaron de 683 a 644 nun día.
Mentres, rexistrouse un lixeiro repunte nos novos contaxios, con 390 (dos que 325 foron confirmados por PCR), 39 máis que o mércores, aínda que o número de casos activos descendeu significativamente, ata os 10.040, o que supón 868 menos.
O número de falecidos pola covid-19 desde o inicio da pandemia en Galicia alcanza os 2.154 tras os sete decesos comunicados a última hora deste xoves polo Sergas, que corresponden a falecementos desde o día 16.
O número total de contaxiados ascende a 110.031 e hai 97.855 curados, dos cales 1.214 nas últimas 24 horas.
Nas últimas 24 horas realizáronse 7.288 probas PCR, con unha positividade que se sitúa no 4 %, lixeiramente superior á do día anterior.
Desde o inicio da pandemia fixéronse 1.608.098 probas PCR e 712.759 serológicas.
O descenso de casos activos é xeral en toda as áreas sanitarias.
A Coruña segue á cabeza, con 3.262, 206 menos que o día anterior, tras 84 PCR positivas, (16 máis); mentres que Vigo, a seguinte área en casos activos ten, ten 1.452 (-169), tras 75 PCR positivas (+25).
Santiago de Compostela rexistra un descenso de 211 casos activos nas últimas 24 horas, ata os 1.150, con 25 PCR positivas (-6); e Pontevedra ten 1.398 casos activos (-49), tras 54 PCR positivas (+16).
As áreas de Lugo e Ferrol sitúanse xa por baixo dos mil casos activos, xunto con Ourense, que rebaixou onte esta cifra. Lugo ten 942 casos activos (-78), con 36 novos positivos por PCR (+2); e Ferrol rexistra 993(-73), tras 32 casos novos diagnosticados por PCR (-4).
A área de Ourense baixa aos 843 casos activos(-92), tras 19 probas PCR positivas (+1).
Galicia consegue situar a presión en Uci por baixo do pico da primeira onda
Rexistrouse un lixeiro repunte nos novos contaxios, aínda que o número de casos activos descendeu significativamente
