Galicia continúa como a segunda comunidade con máis bandeiras azuis nas súas praias, con 113, aínda que perde dez con respecto a 2016. España conta con 579 insignias e segue liderando o ranking mundial –de forma ininterrompida desde 1987– a pesar de que perdeu sete bandeiras, principalmente polo aumento de esixencias en materia de depuración, a lei de costas ou a falta de socorristas.
PONTEVEDRA. Os datos, que difundiu este martes a Asociación de Educación Ambiental e do Consumidor (Adeac), colocan de novo a Sanxenxo como o municipio galego con máis bandeiras azuis, cun total de 11. Na provincia de Pontevedra destacan tamén Vigo, que mantén as nove logradas en 2016; e a recuperación da insignia para A Concheira e A Ribeira, en Baiona; e a de Panxón, en Nigrán. A provincia terá este ano 53 galardóns nos seus areais, catro menos que o ano pasado.
LUGO. Na provincia de Lugo hai 13 bandeiras azuis, oito menos que en 2016, aínda que as seis de Barreiros xa foran retiradas en agosto. Son as de Foz (Peizás, Llás, As Polas e A Pampillosa; perde Areoura), O Vicedo (Abrela, Xilloi), Viveiro (Area), Xove (Esteiro), Cervo (O Torno), Burela (A Marosa e Ril; perde O Portelo) e Ribadeo (Os Castros – Illas As Catedrais).
Barreiros perde as seis que tiña cando foron anunciadas en maio do ano pasado (As Pasadas, Lóngara, Coto, Cantil-Remior, Arealonga e Fontela-Valea), aínda que realmente Adeac xa llas retirou en agosto principalmente por deficiencias no servizo de socorrismo. A principios de 2017, o alcalde, Afonso Puente (PP), xa anunciou que este ano non solicitaría as bandeiras para evitar "controversia" entre os veciños.
A CORUÑA. Na provincia da Coruña é o municipio de Arteixo o que ten máis recoñecementos, con sete, seguido de Boiro, con seis. Camariñas e Ponteceso volven sumarse á lista coa praia de Arou e de Valarés, Ermida e Osme, respectivamente.
Con 113, Galicia segue como a segunda con máis praias acreditadas logo da Comunidade Valenciana, con 129, catro máis que en 2016. Cataluña, con 95 e Andalucía, con 90, ocupan o terceiro e cuarto posto, respectivamente.
As distincións en Galicia elévanse a 131 se se inclúen os portos deportivos. En 2017 a comunidade obtén 18 galardóns, dos que oito son das provincias de Pontevedra, outros oito da Coruña e dous de Lugo.
Neste enlace podes consultar todas as bandeiras azuis de Galicia en 2017
