Galicia, unha das únicas tres CC AA que cumpren o obxectivo de déficit en 2015

Galicia foi, xunto con Canarias e País Vasco, unha das tres únicas comunidades autónomas que cumpriron o obxectivo de déficit en 2015, ao pechalo no 0,57%.

Así o confirmou o ministro de Hacienda y Administraciones Públicas en funcións, Cristóbal Montoro, que este xoves compareceu en rolda de prensa para explicar os datos de déficit público en España, que en 2015 situouse ao redor dos 50.000 millóns de euros (5,1% do PIB), máis de 8.000 millóns por enriba dos obxectivos pactados con Bruxelas (4,2% do PIB).

CULPA ÁS CC AA. O ministro destacou que na lexislatura o déficit reduciuse practicamente á metade (desde o 9,13% en 2011) e en comparación interanual baixouse do 5,5% do PIB (2014) ao 5,16% (2015), unha nova redución pero "insuficiente" en relación cos compromisos europeos, recoñeceu.

O titular de Hacienda explicou que este incumprimento se debe "practicamente" ás comunidades autónomas, que se desviaron en relación ao seu obxectivo en case un punto (1,66% do PIB respecto ao 0,7% pactado).

Segundo dixo, só tres comunidades cumpriron en 2015 os seus obxectivos de déficit: Galicia (0,57%), Canarias (0,54%) e País Vasco (0,69%), o que demostra, ao seu entender, que aínda que o obxectivo era "ambicioso, podíase cumprir". Incluso, con gastos extraordinarios como o financiamento de medicamentos a máis de 50.000 enfermos de hepatite C, que ascendeu a 1.090 millóns de euros. Ao seu xuízo, este gasto é "representativo" de que para o Goberno "a corrección do déficit non significa obviar as necesidades sociais máis perentorias".

Ao lado contrario, Cataluña terminou o exercicio cun déficit do 2,7%, seguida por Estremadura co 2,64%, por Murcia co 2,52% e a Comunidade Valenciana co 2,51% do PIB, moi por encima do obxectivo do 0,7% establecido para o exercicio, segundo os datos do Ministerio de Hacienda feitos públicos este xoves.

Aínda que a Seguridade Social tamén pechou por enriba do que debería (1,26% do PIB, fronte a 0,6%), isto compensouse coa administración central, que cumpriu sobradamente" ao quedar dúas décimas por baixo (2,7% fronte ao obxectivo de 2,9%) e ao superávit das corporacións locais (0,44%), dixo Montoro.

Delas, recoñeceu o seu "gran mérito". "Hai máis de 8.100 concellos e presentan este saldo tan positivo, quere dicir que non por ter un número de administracións é incompatible con estar saneado en España. Cando algúns pretenden suprimir entidades tan saneadas, podíanse fixar noutras", dixo o ministro, nunha mensaxe contra a supresión das deputacións exposta por PSOE e Ciudadanos.

LÍMITE DE GASTO. Ante esta situación, o Goberno tomará "medidas", acordadas pola Comisión Delegada para Asuntos Económicos que presidiu este xoves Mariano Rajoy, para paliar no posible estas desviacións autonómicas. Entre elas, aplicar a Lei Orgánica de Estabilidade Orzamentaria e Sustentabilidade Financeira e a regra de gasto.

O Executivo vai obrigar as comunidades que incumpren a aprobar un acordo de goberno de non dispoñibilidade para garantir que os recursos de financiamento extra que recibirán este ano non sirvan para financiar novo gasto, senón o que xa está previsto e están a executar este ano.

"Non se trata de instar a que recorten senón a que non aumenten gasto público sobre o que xa están a facer", dixo Montoro, para recordar que as autonomías van recibir este ano 10.000 millóns de euros máis dos Orzamentos Xerais do Estado que en 2015.

Ademais, farase público mensualmente o cumprimento da regra de gasto por parte das autonomías, esa obrigación de non gastar máis do que se ingresa, para o que os interventores dos gobernos autonómicos terán que informar tamén mes a mes a Hacienda.

COMPARECENCIA NO CONGRESO. Montoro asegurou que comparecerá "pronto" ante a Comisión de Hacienda do Congreso, a petición propia, para explicar estes plans e datos. "Temos que adoptar medidas por esa desviación demasiado significativa (das comunidades), seguindo a recomendación que é xa advertencia da Comisión Europea o 9 de marzo", engadiu.