O Goberno encargou á asesoría xurídica do Estado un informe sobre a situación do pazo de Meirás, segundo informou este mércores o delegado do Goberno en Galicia, Javier Losada, aos representantes da Comisión pola Recuperación da Memoria Histórica da Coruña. Trátase dun informe complementario aos traballos xa realizados e co obxectivo de que aborde todos os aspectos xurídicos máis aló das accións desenvolvidas desde a Deputación da Coruña e do acordo do Parlamento de Galicia.
Losada tamén trasladou á Comisión pola Recuperación da Memoria Histórica a intención do Goberno de avanzar "paso a paso desde o rigor, coa máxima cautela e todas as garantías xurídicas en cada acción encamiñada a facer efectiva a recuperación da memoria histórica". Esta comisión, pola súa banda, presentoulle ao delegado do Goberno en Galicia a marcha que desenvolverán o próximo 10 de novembro desde Sada ao Pazo de Meirás.
A Comisión pola Recuperación da Memoria Histórica valorou positivamente os xestos para dar resposta á demanda exposta por partidos, sindicatos e entidades de diferente signo para devolver o pazo aos cidadáns, informa a Delegación do Goberno nun comunicado.
