A Garda Civil detivo en Xinzo de Limia ao home que presuntamente agrediu este xoves á súa parella cun machete en Cangas do Morrazo, segundo informaron a Efe fontes do instituto armado.
O presunto agresor foi interceptado sobre as 18.00 horas no acceso da autovía A-52 desde Xinzo de Limia, detallan as fontes.
A agresión produciuse sobre as 14.00 horas na rúa San José de Cangas, onde se dirixiu a Policía Local tras recibir a alerta dunha veciña que escoitou os berros da vítima.
A muller resultou ferida de gravidade e foi trasladada ao hospital Álvaro Cunqueiro de Vigo.