A Garda Civil detivo este domingo a un home de 56 anos que supostamente matou á súa muller de dous disparos en Cabana de Bergantiños, segundo informaron fontes da Delegación do Goberno en Galicia.
O suceso produciuse pouco antes das 18.00 horas deste domingo no lugar de Tras de Agra, desde onde alertaron ao 112 de que a muller recibira dous disparos por detrás e a pouca distancia.
Supostamente foi o seu marido —co que estaba en trámites de divorcio— o causante da morte da vítima, duns cincuenta anos e nai de dous fillos, de 23 e 27 anos, de ambos.
Os fillos, que estaban presentes na vivenda no momento da agresión, avisaron a un tío, que se desprazou ata o lugar dos feitos e conseguiu reducir ao agresor.
Ata o punto de suceso mobilizouse unha ambulancia con base en Ponteceso, un médico e unha enfermeira da PAC deste municipio, así como un helicóptero do 061 con base en Santiago.
O home foi detido pola Garda Civil. As fontes consultadas indicaron que non existían denuncias previas no seo da parella. Así mesmo, transcendeu que o agresor está a tratamento prol depresión, aínda que levaba varios días sen tomar a medicación.
O xulgado de garda de Carballo fíxose cargo da investigación.
Trátase do terceiro crime machista no que vai de ano en Galicia,
pois anteriormente un home matou á súa muller e suicidouse no Porriño e outra foi degolada polo seu esposo na Coruña.