Un home de 51 anos de idade faleceu este sábado nos calabozos da comisaría da Policía Nacional de Vigo tras sufrir un paro cardíaco, segundo informou a Policía Nacional.
O falecido fora arrestado pola Policía Local de Redondela porque "estaba a causar problemas na vía pública, enfrontándose aos axentes de forma moi agresiva", polo que foi trasladado á PAC antes de ir aos calabozos.
Unha vez atendido, foi levado á comisaría da Policía Nacional e realizáronse as dilixencias correspondentes, pero "visto que o estado de agresividade non remitía, solicitouse a presenza nos calabozos dos servizos sanitarios".
O servizo de seguridade dos calabozos observou que o detido non se atopaba ben, así que se solicitou a presenza do persoal médico de novo, momento en que o arrestado "sufriu un paro cardíaco e do que durante 30 minutos intentaron reanimarlle os servizos sanitarios, sendo infrutuosos todos os intentos, producíndose o falecemento do home seguidamente", segundo relatan fontes da policía nacional.
A morte foi comunicada ao xulgado de garda, que determinou a presenza do médico forense.
O cadáver foi conducido ao Hospital Nicolás Pena para practicarlle a correspondente autopsia.
