As listas de admisión a 21 carreiras do Sistema Universitario de Galicia (SUG) pecharon este venres, día no que a Comisión Interuniversitaria de Galicia (CiUG) abriu a segunda convocatoria para o próximo curso 2018/19. A gran maioría delas (15) correspóndense a dobres graos.
Segundo datos da CiUG, as carreiras que pecharon coa maior nota de corte foron a simultaneidade de estudos en Matemáticas e Física, cun 13,306, e en Comunicación Audiovisual e Xornalismo, cun 12,785. Ambas opcións ofértanse na Universidade de Santiago de Compostela (USC).
Outras ofertas formativas que tamén pecharon a admisión foron os graos en Educación Infantil, en Educación Primaria e en Educación Especial, pola Universidade da Coruña (UDC), ou os graos en ADE e Dereito pola UDC e a Universidade de Vigo (UVigo), entre outros.
Por outra banda, as carreiras que aínda non pecharon e que manteñen as notas de corte máis altas –aínda que baixaron na última semana–, son Medicina, cun 12,416; Biotecnoloxía, cun 12,258; e Odontoloxía, cun 12,092. Todas elas na USC.
Así mesmo, outras opcións que escollen os alumnos con mellores notas na Avaliación de Bacharelato para ou Acceso á Universidade (Abau) son Enfermería na USC (11,444) e Enxeñería Biomédica na UVigo (11,570).
MATRÍCULA ENTRE O 24 E O 27. A semana pasada, a CiUG deu a coñecer as primeiras listas de admitidos para o próximo curso na educación superior. Así, os primeiros alumnos puideron matricularse, se o desexaron, ao longo da semana.
O luns pasado souberon se accedían á primeira opción desta listaxe. De non ser así, puideron ser convocados nesta segunda lista, de modo que se poderán matricular entre este martes e este venres, se o desexan.
Se non foron convocados a matricularse na carreira da súa preferencia, poderán esperar á publicación de futuras listas. Os próximos cortes serán publicados pola CiUG o vindeiro martes, 31 de xullo, o 28 de agosto, o 4 e 10 de setembro, e o 4 e 11 de outubro.
Así, se un estudante aínda non foi convocado, terá a opción de esperar á publicación de ata outras seis listas de admitidos, polo que podería ser que ata o mes de outubro non coñeza de forma definitiva o grao universitario ao que accede.
