A Brigada Central de Estupefacientes incautou 400 quilos de cocaína que acababa de introducir por Galicia un dos dous grandes clans que permanecen activos.
A droga, cuxos logos orixinais foran substituídos, entrou polas Rías Baixas nunha embarcación como parte dun alixo moito maior. Atopábase almacenada nunha nave do arrabalde de Madrid á espera de ser transportada a Reino Unido, destino final da mesma.
A colaboración internacional resultou esencial para que frutificase o operativo.
TRÁFICO DE DROGAS EN MOS. Por outra banda, un home foi detido en Mos por un suposto delito contra a saúde pública –venda de sustancias estupefacientes– despois de que axentes da Policía Local atopasen doses de heroína e cocaína cun valor no mercado de máis de 1.000 euros no seu coche e 500 en efectivo.
Os feitos tiveron lugar este martes ás 17.00 horas na parroquia de Sanguiñeda, despois de que a Policía Local se dirixise ao automóbil alertada por distintos veciños da realización de transaccións con estupefacientes por parte do seu dono, segundo precisou o Concello nun comunicado.
Posteriormente, os axentes ordenaron ao condutor que se detivese co fin de proceder a rexistrar o seu vehículo. Deste xeito, atoparon un gran número de billetes de 5, 10 e 20 euros no asento do acompañante que se podían ver a primeira ollada.
Así mesmo, os policías locais de Mos revisaron a carteira do home, que contiña unha gran cantidade de diñeiro en efectivo. Ademais, atoparon nunha guantera do coche un estoxo con doses de sustancias estupefacientes preparadas para ser distribuídas, algunhas das cales contiñan o seu prezo. Tras solicitar a colaboración da Garda Civil, os axentes procederon a deter ao dono do automóbil.
