A Asemblea da Asociación de Hospitais de Galicia (Ahosgal) aprobou por unanimidade o nomeamento de José Ramón Santamaría Barreiro como novo director xerente, en substitución de Marta Taboada, que abandona o cargo a petición propia.
Segundo informa a Asociación, José Ramón Santamaría asume as novas funcións co labor de proseguir na defensa dos intereses dos hospitais que forman parte da asociación e a promoción da asistencia sanitaria de calidade, universal e accesible en Galicia.
Así mesmo, buscará "incrementar a colaboración pública e privada para contribuír á sustentabilidade e eficiencia do sistema sanitario galego".
O novo director xerente de Ahosgal conta cunha dilatada traxectoria profesional no ámbito da xestión hospitalaria e a organización patronal sanitaria. Desde 1988 ata finais do pasado mes de novembro exerceu como xerente do Hospital Vithas A nosa Señora de Fátima Vigo, cargo que abandonou por xubilación. Paralelamente, foi presidente da Federación Galega de Clínicas Privadas (1988-1999), membro do Comité Executivo da Federación Nacional de Clínicas privadas (1997-2010) e membro da Comisión de Vixilancia e Arbitraxe do Convenio de asistencia para accidentados de tráfico, desde 1997 ata a actualidade.
AGRADECEMENTO POLO TRABALLO FEITO. A Asemblea agradeceu a Marta Taboada o traballo realizado na organización como directora xerente desde a súa constitución, no ano 2011, e ofreceulle manter unha relación coa Asociación como asesora externa.
Ademais, destacou o seu "esforzo e dedicación" na defensa da atención sanitaria de calidade, así como na preservación dos intereses colectivos de todos os centros que integran Ahosgal.
