A procesión do Santo Enterro marcou o ecuador do Venres Santo en Ferrol, día grande da súa Semana Santa, declarada como de interese turístico internacional.
Organizada pola confraría homónima, partiu da Concatedral de San Julián coa Urna do Santo Enterro, que cumpre 125 anos neste 2017.
Autoridades como o conselleiro de Política Social, José Manuel Rey Varela, ou a directora de Turismo de Galicia, Nava Castro, sumáronse á comitiva, que percorreu parte do centro histórico da Magdalena.
Nun desfile previo, os pasos de San Xoán e a Virxe das Dores, ambos da Confraría das Dores, saíron do seu templo na praza de Amboage para unirse ao comezo da procesión. Persoal militar tamén se incorpora á mesma, achegando ademais o acompañamento musical.
Tras esta cita, a Paixón de Ferrol inclúe este Venres Santo outras dúas marchas, as da Soidade e Os Caladiños, que transitarán de madrugada as rúas máis céntricas da cidade naval.
O cheo en hoteis, establecementos de hostalería e actividades programadas estes días na urbe supuxo unha lombeirada á Semana Santa de Ferrol, que habitualmente se converte no período do ano con maior afluencia de turistas. Ao 100 % de ocupación nos aloxamentos sumouse o feito de que este venres atraque no porto o cruceiro Oriana, con 3.000 persoas a bordo.
As procesións seguirán o Sábado Santo e o Domingo de Resurrección. Ademais, o Luns de Pascua é festivo local, data na que celebra a romaría da Virxe de Chamorro.
A centenaria urna do Santo Enterro percorre as ateigadas rúas de Ferrol
