Miles de persoas manifestáronse este domingo polas rúas do centro de Lugo, convocadas por unhas cincuenta asociacións feministas de toda Galicia, agrupadas no colectivo Galegas8M, como prólogo do 8 de marzo, Día Internacional da Muller, para defender os dereitos das mulleres e reivindicar as conquistas sociais conseguidas pola loita feminista.
Nun ambiente festivo, con música e consignas a favor dos dereitos das mulleres, as manifestantes portaban pancartas con mensaxes como O xénero está entre as orellas, non entre as pernas, Xuntas na loita feminista, Querémolas vivas e libres ou Cambiaría a miña voz por erguer a vosa –que levaba un dos centos de homes que tamén se sumaron á protesta–.
Ana Torrón, portavoz do movemento Galegas8M, fixo un balance "moi positivo" da resposta a esta convocatoria, froito dun "traballo ímprobo de moitas compañeiras".
"Merecemos que a xente esperte, se solidarice e baixe á rúa para estar connosco nesta mañá tan espléndida", sinalou Ana Torrón, quen recoñeceu que "non é nada fácil mobilizar" á xente para que se manifeste, aínda que neste caso "dado o panorama político actual", sobran "motivos para que a cidadanía se revolva".
É necesario que a xente se dea conta de que hai que saír á rúa e non dar nin un paso atrás para conservar os dereitos das mulleres, porque non queremos perdelos, hai moita xente que loitou, que deu a vida por eles, e iso é sagrado".
"Estimamos que hoxe podemos chegar aquí ás 10.000 persoas", subliñou Ana Torrón, chegadas desde todos os lugares de Galicia.
Daniela, do colectivo Amizando, de persoas "transadultas de Galicia", apuntou que as "mulleres trans séntense parte" da "loita feminista", para enfrontarse "ao patriarcado e ao machismo, que nos mata cada día, a nós tamén".
Outra manifestante, Gemma, contou a EFE que "hai moitas cousas que reivindicar, tanto a nivel estudantil, laboral, como doméstico, das tarefas non remuneradas que fan as mulleres ao longo da súa vida e que non son recoñecidas pola sociedade, nin pola súa familia, nin pola súa contorna máis próxima. Aínda faltan moitas cousas para alcanzar a igualdade".
REACIÓNS. Ana Seijas, de En Marea, indicou que a manifestación de hoxe ten que servir para "reivindicar os dereitos de todas as mulleres", porque non se pode "dar nin un paso atrás", especialmente "nun momento complicado, onde hai un retroceso", porque a "misoxinia e o patriarcado están totalmente arraigados nesta sociedade".
A dirixente nacionalista Ana Pontón, do BNG, dixo que o 8 de marzo ten que ser unha data crave para "pararlle os pés a esa dereita rancia e carca que, de novo, o que pon en cuestión son os dereitos das mulleres".
Ao seu xuízo, tanto o 8 de marzo como "este preludio" son dous días para "reivindicar que o mundo non funciona sen mulleres" e que "o feminismo é unha alternativa democrática" para avanzar en dereitos e "dicilo alto e claro aos gobernos que non tomaron nota do malestar das mulleres".
Pola súa banda, Ramón Carballo, candidato do PP á Alcaldía de Lugo, asegurou que hoxe "é un día importante", porque na "igualdade" entre homes e mulleres "todos estamos implicados".
Ao seu xuízo, non se trata dunha cuestión "partidista" e "ninguén debe aproveitarse desa loita", porque "nesta manifestación estamos todos" e "se alguén loitou pola igualdade foi o Partido Popular, con leis". "Ninguén nos pode dar leccións de nada", deslizou.
A alcaldesa de Lugo, Lara Méndez, observou que "o feito de que se avanzou moito" e de que se conquistaron" moitos "dereitos para as mulleres" débese tamén a que houbo persoas que se deixaron "a vida" nesa loita.
Desde o seu punto de vista, estamos "nun momento de inseguridade tremenda", no que hai forzas que cuestionan os pasos adiante que se deron en materia de igualdade, o que xustifica que a cidadanía se bote á rúa para defendelos.
