Un total de 1.866 opositores dos 2.557 que estaban admitidos acudiron este fin de semana ao recinto da Feira Internacional de Galicia (Silleda) para realizar os exames do concurso oposición correspondentes á convocatoria do ano 2018. Estas cifras supoñen unha porcentaxe media de participación do 72,98%, segundo informou a Xunta nun comunicado.
Na quenda deste domingo pola tarde acudiron a examinarse as categorías de técnico superior en documentación sanitaria, dos que se presentaron 214 dos 269 admitidos, o que supón unha participación do 79,55%; e o grupo técnico da función administrativa, categoría na que se presentaron 177 persoas das 277 admitidas, o que representa un 63,9%.
Do número total de aspirantes admitidos para a realización das probas selectivas que se celebraron este fin de semana en Silleda, 1.010 corresponden á categoría de médico de familia, 277 á de grupo técnico da función administrativa, 774 á de grupo de xestión da función administrativa, 227 a enxeñeiro técnico e 269 optan a técnico superior en documentación sanitaria.
Neste proceso ofértanse un total de 286 prazas, das cales 241 pertencen á categoría de médico de familia, 18 ao grupo de xestión da función administrativa, 11 a técnico superior en documentación sanitaria, 9 a grupo técnico da función administrativa e 7 corresponden a enxeñeiro técnico.
O 53,34% dos admitidos teñen actualmente vínculo activo co Servizo Galego de Saúde. Como datos de interese, a Xunta subliña que o3,17 % dos aspirantes proveñen de fóra da comunidade autónoma galega, o 41,93% teñen menos de 40 anos, e o 68,36% do total son mulleres.
