O Diario Oficial de Galicia publica na súa edición deste venres o lugar e a data de realización dos exercicios da fase de oposición dos procesos selectivos convocados para o ingreso nas categorías de médico de familia, grupo técnico da función administrativa, grupo de xestión da función administrativa, enxeñeiro técnico e técnico superior en documentación sanitaria.
Foron admitidos 2.557 aspirantes, dos cales 1.010 corresponden á categoría de médico de familia, 277 á de grupo técnico da función administrativa, 774 á de grupo de xestión da función administrativa, 227 a enxeñeiro técnico, e 269 optarán ás prazas de técnico superior en documentación sanitaria.
Neste proceso ofértanse un total de 286 prazas, das cales 241 pertencen á categoría de médico de familia, 18 ao grupo de xestión da función administrativa, 11 a técnico superior en documentación sanitaria, 9 a grupo técnico da función administrativa e 7 corresponden a enxeñeiro técnico.
As probas selectivas celebraranse no recinto da Feira Internacional de Galicia, en Silleda durante o fin de semana do 24 e 25 de novembro.
Este proceso selectivo incorpora importantes novidades para dotar dunha maior seguridade ao proceso nas súas diversas fases, entre as que destaca a posta a disposición dos tribunais de selección dunha plataforma de seguridade para a elaboración de cada un dos exercicios da fase de oposición, garantindo desta forma o seguimento de todo o proceso, así como a selección aleatoria e automatizada das preguntas do exame.
