O próximo 25 de xullo, coincidindo coa festividade do Apóstolo, máis de 300 cidades de todo o mundo exhibirán unha alfombra floral elaborada en homenaxe ao Camiño de Santiago.
En rolda de prensa, o concelleiro de Turismo de Santiago, Gumersindo Guinarte, presentou este xoves a imaxe desta alfombra floral do Xacobeo 2022, un evento que cualificou de extraordinario "para realzar aínda máis o atractivo patrimonial da cidade".
Pola súa banda, o presidente da Comisión Xestora de Entidades Alfombristas do Camiño de Santiago, Miguel A. García Correa, subliñou que a intención é facer unha homenaxe "a escala mundial" ao Camiño a través desta "arte efémero e con gran presenza en Galicia".
Esta iniciativa impulsouna o ano pasado a comisión que preside García Correa e constitúe o evento alfombrista máis grande do mundo a día de hoxe.
No día do Apóstolo exhibirase en Santiago, nunha localización que tanto García Correa como o concelleiro esperan que sexa a Praza da Inmaculada, unha alfombra floral de oito por oito metros co deseño do artista portugués Antonio Cunha.
A actividade consiste en que, entre os días 23 e 25 de xullo, recrearase a alfombra Xacobea en distintas cidades do mundo, tendo de base o deseño orixinal pero elaborado coa súa técnica e estilo. Así mesmo, terá o requisito de pór o nome da cidade e a distancia en quilómetros que a separa de Santiago.
Ata a data rexistráronse máis de 300 cidades, das cales 105 son españolas (30 galegas), 74 italianas, 28 da India, 22 mexicanas, 15 portuguesas e o resto repártense polos cinco continentes.
ALFOMBRA MUNDIAL. O deseño, seleccionado por votación entre todas as comunidades alfombristas, representa a Cruz de Santiago como "o faro que guía aos peregrinos cara poñente", segundo García Correa. Ademais, a alfombra busca ser unha alegoría das vidreiras que se atopan nas igrexas ao longo do camiño.
A Comisión Xestora de Entidades Alfombristas do Camiño de Santiago creouse para impulsar o Xacobeo 2021-22 e inicialmente estaba conformada polos alfombristas de Bueu, Gondomar, Tui, Redondela, Ponteareas e os asturianos de Castropol.
O ano pasado incluíuse a expresión artística na celebración do Xacobeo, de tal forma que se reproduciu por primeira vez a Alfombra Mundial Xacobea, na que participaron 260 cidades.
