A ría de Arousa rexistrou este mércores, ao redor das 11.30 horas, unha manga mariña, un fenómeno meteorolóxico relativamente frecuente que se produce en xornadas de inestabilidade atmosférica.
A manga mariña, moi difícil de predicir, non tocou terra nesta ocasión, segundo informan desde Meteogalicia. Neste vídeo compartido por Beni Outeiral Pego en Facebook observamos a súa espectacularidade.
O litoral da provincia da Coruña, en alerta laranxa este mércores, por forte vento do suroeste rexistrou refachos de ata 125 quilómetros por hora. Esta cifra alcanzouse, en concreto, en Cedeira.
No municipio lucense da Pontenova houbo refachos de 100 km/ h, mentres que se superaron os 90 en Malpica e Vimianzo.
O xoves está previsto que siga a alerta amarela na costa galega por ondas e tamén en zonas do interior da Coruña e Pontevedra por acumulacións de auga de entre 40 e 80 litros por metro cadrado en doce horas, debido á chegada dun sistema frontal que deixará choivas importantes ao final do día.
