O maquinista e o interventor do tren Alvia, que descarrilóu en xullo de 2013 nos arredores de Santiago de Compostela, un accidente no que morreron oitenta pasaxeiros, foron citados a comparecer a próxima semana ante unha comisión do Congreso dos Deputados que investiga as causas do sinistro, segundo o calendario divulgado este venres por esa institución lexislativa.
O maquinista Francisco José Garzón e o interventor Antonio Martín Marugón foron citados a comparecer o vindeiro mércores ante a comisión, xunto á directora da oficina de atención a vítimas do operador ferroviario Renfe, Carmen Jiménez, e a representantes de asociacións de vítimas.
A comisión iniciará a súa sesión o vindeiro martes coa comparecencia dos responsables de asociacións de vítimas e familiares de pasaxeiros, xa que ademais dos oitenta mortos, outro centenar e medio de pasaxeiros resultaron feridos de diversa consideración, e proseguirá o mércores coa intervención dos tripulantes do convoi.
