A candidata de Cs pola Coruña, Marta Rivera, animou este domingo a votar para conseguir unha alta participación nos comicios porque "é un día importante para Galicia, para A Coruña e para España".
Rivera visitou un Colexio Electoral na Coruña, pero xa emitira o seu voto por correo o primeiro día que se abriu o prazo.
Acostuma a votar por esta vía, dixo, porque "nunca" sabe onde estará o día das eleccións e unha vez, confesou, xa perdeu o dereito ao voto por non ter previsto un desprazamento nesa xornada. "Desde iso sempre voto por correo", admitiu a aspirante pola Coruña pero que está censada en Lugo.
Rivera confiou en que se dea este domingo unha "alta participación e tranquilidade na xornada". A candidata coruñesa comerá con familia e amigos, e logo desprazarase á capital galega desde onde realizará o seguimento co resto dos candidatos nun hotel compostelán.
