A última fin de semana de outubro traerá, ademais do cambio de hora, a primeira gran vaga de frío da tempada. Segundo a Axencia Estatal de Meteoroloxía (Aemet), unha masa de aire moi frío "de procedencia practicamente polar" chegará á Península acompañada de ventos do norte e unha "importante baixada das temperaturas" que incluso podería deixar neve nas montañas de interior de Galicia.
Logo dunha semana de estabilidade e sol na comunidade, o descenso das temperaturas empezará o venres e continuará os próximos días. Así, os termómetros poderían esborrallarse o domingo ata marcar 1 grao de mínima e 7 de máxima en Lugo, onde, ademais, espérase que chova. "É un pouco pronto para falar de cotas de neve, pero serían baixas para a época, nuns 1.200 metros", indicou un dos portavoces da Aemet Rubén del Campo.
Espérase que a borrasca e a vaga de frío se manteñan sobre a provincia ata principios de novembro.
