O xefe de servizo da Unidade de Transplante Abdominal do Complexo Hospitalario de Santiago de Compostela (CHUS), Evaristo Varo, insistiu este mércores en que a dilación na administración de fármacos para o tratamento da hepatite C causou oito mortes en Galicia e estaba motivada por criterios económicos.
Varo foi citado este mércores para declarar ante o xuíz Andrés Lago Louro, que instrúe a causa destas mortes, polas que están a ser investigados dous altos cargos do Servizo Galego de Saúde (Sergas) por senllos delitos de prevaricación e homicidio imprudente en seis dos oitos casos; ante quen ratificou esta versión.
En declaracións a Efe posteriores á súa saída dos xulgados, onde testificou durante máis de dúas horas, o sanitario dixo estar "satisfeito" por poder achegar a súa visión de todo "o que se denunciou no seu día" e que terminou coa apertura dun procedemento xudicial.
Para Varo, existiu unha clara "dilación" na subministración dos fármacos necesarios para o tratamento desta enfermidade por parte do Goberno galego, en base a uns "criterios arbitrarios" que -engadiu- apártanse das recomendacións das distintas institucións sanitarias a este respecto.
Desta forma, "a única explicación" desta decisión -razoou- é que primen os criterios económicos sobre os sanitarios, nun intento de "aforrar", nun contexto de crise e de recortes.
Pola súa banda, o Sergas considera que as novas declaracións realizadas "non acreditan" que poidan atribuírse "atrasos" á subcomisión de Farmacia.
A través dun comunicado de prensa, a Consellería de Sanidade considera que non se poden atribuír os atrasos á subcomisión de farmacia na dispensación dos medicamentos" e, de feito, considera que as declaracións feitas en sede xudicial "veñen confirmar a correcta actuación deste órgano".
Fontes xurídicas aseguraron a Europa Press que, precisamente, a liña de defensa que está a seguir o Sergas na causa –polas preguntas que fai– é a de tratar de estender unha eventual culpa nos atrasos entre outras instancias sanitarias, co obxectivo de quitar a culpa aos dous altos cargos investigados, Félix Rubial e Carolina González-Criado.
"ACTUOUSE SEGUINDO PROTOCOLOS". A Consellería de Sanidade mantén que "quedou de novo acreditado" que se actuou seguindo os protocolos e os criterios farmacoterapéuticos comúns establecidos polo Sistema Nacional de Saúde (SNS) para "garantir un acceso homoxéneo e igual para toda a cidadanía a estes novos medicamentos" que nesa fase aínda non estaban "autorizados nin sequera para ser comercializados en España".
