Yolanda Díaz, Xaime Subiela e José García Buitrón, membros da candidatura de En Marea para as eleccións do 20-D, visitaron este mércores as instalacións de Navantia en Ferrol, onde se reuniron co comité de empresa co fin de analizar e presentar as súas propostas.
O número dous nas listas para o Congreso de En Marea, Yolanda Díaz, tachou de "insuficiente" a carga de traballo anunciada polo Goberno autonómico, en relación a un sector naval "estratéxico para Galicia e para o conxunto do Estado".
Os membros de En Marea recolleron do comité de empresa "propostas relevantes para o futuro da comarca, que necesita a Navantia Ferrol e a outro enorme pulmón chamado Navantia Fene", indicou Yolanda Díaz. A viceportavoz de AGE no Parlamento de Galicia destacou "a necesidade de investimentos produtivos", sendo o dique flotante "imprescindible para fortalecer a división de reparacións".
Ademais, remarcou a "falta de ousadía" do presidente da Xunta de Galicia, Alberto Núñez Feijóo, para visitar as instalacións do estaleiro e reunirse cos representantes dos traballadores.
Pola súa banda, o número tres de En Marea pola Coruña para o Congreso, Xaime Subiela, indicou que "hai moita xente no comité e no conxunto do persoal de Navantia que ve que non se ten en conta de forma real".
Subiela engadiu que os traballadores botan en falta "decisión e acción" e que sería "importante" que o I+D+I, o coñecemento xerado nas universidades, teña "unha translación práctica coa fabricación" e "sirva para facer propostas competitivas", en relación á petición do desenvolvemento con recursos materiais e humanos do centro que asocie os estaleiros coa investigación e a universidade aproveitando o CIS da Cabana.
Para rematar, o aspirante para o Senado José Buitrón destacou que "o progreso está no fortalecemento dos servizos públicos e non na privatización".
A candidatura de En Marea cita como prioridade a elaboración do plan industrial acordado coa representación sindical dos traballadores.
Membros de En Marea presentan os seus proxectos ao comité de empresa de Navantia
A candidatura considera prioridade a elaboración do plan industrial acordado coa representación sindical dos traballadores
