Miles de persoas percorreron este xoves as rúas de Vigo nunha manifestación convocada pola Xunta de Persoal da EOXI pola "dignidade da sanidade pública" e baixo unha pancarta que dicía "Pola Sanidade Pública. Xunta de Persoal". Trátase da segunda manifestación realizada en Vigo en menos dun mes co obxectivo de que o Servizo Galego de Saúde poña a disposición de todos os traballadores "máis recursos e melloras na atención aos pacientes".
A marcha partiu pasadas as 20.00 horas do Punto de Atención Continuada (PAC), próximo á Praza de España, e dirixiuse cara á Porta do Sol, tras atravesar Gran Vía, Urzáiz, Colón e Policarpo Sanz. Á cabeza da manifestación ían os representantes dos traballadores do sector sanitario de Vigo e un pouco máis atrás atopábanse os representantes políticos.
Entre eles, o alcalde de Vigo, Abel Caballero; o portavoz municipal de Marea de Vigo, Rubén Pérez; o secretario dos socialistas galegos, Gonzalo Caballero; o portavoz de En Marea, Luís Villares, ou o candidato do BNG á alcaldía de Vigo, Xabier Pérez Iglesias; entre outros.
Todos coincidiron en culpar desta situación que atravesa a sanidade en Vigo ás políticas da Xunta de Galicia e concretamente, ao presidente, Alberto Núñez Feijóo. "Feijóo atenda, a saúde non se vende", "Privatización, é corrupción", "Feijóo escoita, os PACs están en loita", ou "Nin un paso atrás" foron algúns dos cánticos que se puideron escoitar nesta marcha.
Tras a manifestación, leuse un manifesto no que se deixou constancia de que a poboación da área sanitaria de Vigo é a que "máis riqueza crea en Galicia" e é a que peor "sanidade recibe" por non ter os recursos estruturais públicos tanto en Primaria como en Hospitalaria para cubrir a toda a poboación.
No discurso, tamén houbo alusión ao "déficit de recursos humanos" para cubrir as baixas e xubilacións do persoal. Ante esta situación, denunciaron a "responsabilidade política da Xunta e do seu presidente ao paralizar o proxecto hospitalario único que unificaba os servizos e centralizaba a Urxencia nunha porta única de urxencias, que daba cobertura a toda a poboación de referencia da área sanitaria de Vigo".
Os organizadores tamén criticaron os "recortes en persoal" que están a provocar "unha situación de deterioración dos servizos tanto de Atención Primaria como especializada". Por todo iso, esixen contratos dignos e estables no tempo, así como a inmediata apertura dunha mesa de negociación na que se recupere a Xerencia de Atención Primaria. Ademais, transparencia e "realidade nas listas de espera".
LISTAS DE ESPERA. Mentres, o presidente do Goberno galego, Alberto Núñez Feijóo, criticou que o Ministerio de Sanidade non convoque un MIR extraordinario que serviría para "dispor de máis profesionais" de Atención Primaria e pediatría durante "catro anos". "Discrepamos e despois cada un terá que asumir as súas propias responsabilidades", engadiu.
Estas declaracións fíxoas este xoves tras a reunión semanal co seu Executivo, despois de que este mércores se celebrara en Madrid unha reunión entre a ministra de Sanidade, María Luisa Carcedo, e os dirixentes sanitarios autonómicos no Comité de Recursos Humanos do Sistema Nacional de Saúde (SNS).
“Estes datos, os máis baixos de toda a serie histórica, consolidan a Galicia entre as comunidades autónomas cun menor tempo de espera”, apuntou en declaracións á prensa o xerente do Sergas, Antonio Fernández-Campa, e sinalou que segundo o Ministerio de Sanidade, “a media estatal é de 106 días de espera”.
