Miles de persoas marchan en Galicia contra as políticas de refuxiados da UE

Miles de persoas protestaron na tarde deste mércores nas principais cidades galegas para expresar o seu rexeitamento ao "indigno" acordo que a Unión Europea pretende asinar con Turquía e que, a xuízo dos manifestantes, contraviene "os máis elementais dereitos humanos e os acordos internacionais en materia de refuxio e inmigración". O Foro Galego de Inmigración sumouse, en solidariedade coas persoas exiliadas, a unha convocatoria que foi secundada en Lugo, Pontevedra, A Coruña, Santiago, Vigo, Ferrol, Oleiros, Vilagarcía e Burela, entre outras localidades da comunidade, ao entender que dito pacto posibilita as deportacións colectivas de persoas, o que retrotrae á sociedade "aos peores momentos da historia de Europa do século XX". Ademais a entidade censura que se pretenda "comprar" en Turquía "campos de internamento destas persoas para quitarse de forma intolerable esta realidade de enriba".

Na capital lucense, a cidadanía optou por expresar co seu silencio e cos seus donativos de alimentos non perecedoiros o seu apoio aos refuxiados sirios e a súa repulsa contra as represivas políticas que a Unión Europea está a aplicar aos exiliados. Foron centos de cidadáns anónimos, de todas as idades, os que abarrotaron a praza Armanyá, fronte á Subdelegación do Goberno de Lugo, e foron decenas de quilos de produtos os que recolleron os promotores desta mobilización social. A recollida de alimentos –excluídos os elaborados do porco– continuará ata o vindeiro luns en cinco puntos: A Cova da Terra, colexio Fingoi, calzados Rocha's, o cafetín Táboa de Flandes e Tecgal Enerxías SL. Á concentración sumáronse cargos públicos do PSDEG-PSOE, como a alcaldesa Lara Méndez, Lugonovo, BNG e Ace-EU e representantes dos sindicatos maioritarios CC.OO., CIG e UGT, que portaban unha pancarta co lema 'Solidariedade galega coas persoas refuxiadas'.

Un sentir idéntico ao que expresaron os cidadáns e colectivos sociais congregados na praza da Peregrina de Pontevedra para reclamar ao Goberno en funcións que preside Mariano Rajoy que non apoie o acordo con Turquía no Consello Europeo deste xoves 17 de marzo. 'Polos dereitos humanos. Non as políticas da UE contra as persoas migrantes e refuxiadas', podíase ler na pancarta que presidiu a mobilización na cidade do Lérez, en liña coas consignas que coreou tamén o medio milleiro de persoas reunidas ante o Museo Marco de Vigo contra o pacto "indecente, inmoral e inhumano" alcanzado polas institucións comunitarias e as autoridades turcas. Na cidade olívica, o acto finalizou coa lectura dun manifesto asinado por organizacións sindicais, políticas e sociais, no que recalcaron que o acordo é contrario á lexislación internacional e consolida o sistema de "devolucións en quente" posto en marcha por España. 

Unha tónica que se repetiu en todas as cidades. 'Oleiros coa poboación civil de Siria. Gobernos terroristas de occidente, ao Tribunal da Haia', podíase ler na pancarta do concello coruñés, e así, en cada unha das mobilizacións, os galegos esixiron ao Goberno español que promova unha "radical" oposición a este acordo e ao Parlamento Europeo que "impida a aprobación do mesmo". E non foron os únicos. O mesmo espírito poboou as rúas de Almería, Bilbao, Cidade Real, Córdoba, Cuenca, Málaga, Melilla, Murcia, Pamplona, Sevilla, Toledo, Valladolid ou Madrid.