O parapentista Guillermo Casás Boubeta, de 54 anos e veciño de Moaña, faleceu este mércores tras caer á auga na zona de Cabo Home, en Cangas do Morrazo. Xunto a el resultou ferido Fernando Ortigueira Ogando, de 46 anos e de Lérez.
Ambos estaban a practicar parapente en os cantís de Donón cando caeron ao mar fronte á estatua da Caracola, a uns 100 metros da beira.
Durante a xornada deportiva, na que tamén participaron outros dous amigos, realizaron dous voos. No primeiro non tiveron maior problema pero no segundo, que xa só realizaron Guillermo e Fernando, si. A falta de vento fixo que a volta deste voo, no que se dirixiron a Punta Couso, se lles complicase, segundo apunta a Televisión de Galicia. O que provocou que os parapentes perdesen altura e non puidesen remontar.
No caso do veciño do Lérez, este puido desfacerse da vela antes de tirarse ao mar e posteriormente saíu da auga polo seu propio pé.
Foron uns ciclistas os que deron a voz de alarma ao ver as velas de Guillermo na auga. Finalmente unha embarcación de Salvamento Marítimo rescatou o corpo sen vida do moañés e o seu compañeiro foi atendido con síntomas de hipotermia.
Tamén foron mobilizados o helicóptero Pesca I, os bombeiros de Bueu, Protección Civil e o 061. O cadáver foi trasladado ao porto de Cangas na embarcación Salvamar Mirach.