Un home faleceu na mañá deste venres logo de quedar atrapado baixo o camión que manexaba no interior dunha nave do Polígono das Gándaras, no Porriño.
O suceso mortal produciuse minutos antes das 09.00 horas desta mañá, tal e como indicaron as persoas que contactaron co 112 Galicia para pedir axuda urxente.
Deste xeito, desde o Centro Integrado de Atención ás Urxencias de Galicia, pediuse a colaboración dos Bombeiros do Baixo Miño para liberar á vítima, que permanecía atrapada baixo o camión cargado con material pesado.
Os efectivos do parque porriñés lograron rescatar ao traballador, pero nada se puido facer por salvarlle a vida. Ademais dos bombeiros, desde o 112 Galicia avisouse aos profesionais de Urxencias Sanitarias de Galicia-061, así como aos axentes da Garda Civil, que, agora, tratan de coñecer todos os detalles deste suceso.
