O Complexo Hospitalario Universitario da Coruña (Chuac) é o hospital de España que máis transplantes realizou en 2015, segundo os datos ofrecidos este martes polo director da Organización Nacional de Transplantes, Rafael Matesanz, e o ministro de Sanidade en funcións, Afonso Afonso.
En concreto, o Chuac realizou neste período 258 transplantes, un 22 por cento máis que en 2014. Deles, 124 foron renais, 59 hepáticos e 25 cardíacos. Ademais, o Chuac realizou 47 transplantes pulmonares conseguindo "unha marca histórica" cun incremento do 81 por cento. Deles, 32 foron bipulmonares e 15 unipulmonares. Tamén houbo catro transplantes de páncreas, 33 transplantes renais de doante vivo, onde tamén se logrou "a máxima cifra histórica", remarcan desde o hospital. A estas cifras, súmanse 10 transplantes renais de doante cadáver, 61 de medula ósea e 68 de córnea.
En canto ás doazóns, houbo 25 multiorgánicas, 33 doantes vivos renais, levándose a cabo a primeira doazón altruísta anónima de Galicia, e 81 doantes de tecidos, principalmente córneas. De acordo cos datos achegados polo complexo hospitalario, houbo un 19 por cento de negativas familiares á doazón.
A idade media dos doantes foi de 57,3 anos e o 32 por cento tiñan máis de 70 anos. Un 72 por cento dos doantes eran homes.
O Chuac, o hospital de España que realizou máis transplantes en 2015
O Complexo Hospitalario da Coruña levou a cabo 258 intervencións deste tipo, un 22% máis que en 2014
