O Sindicato Unificado de Policía (SUP) denunciou este mércores que varios dos policías que o pasado sábado acudiron a un tiroteo entre dous clans xitanos en Santiago non tiñan chaleco antibalas unipersonal.
Nun comunicado, o sindicato puxo de relevancia o caso concreto dun dos axentes que interviron, que solicitara á Dirección Xeral da Policía "de forma expresa" que lle fose proporcionado un chaleco, pero recibira unha "denegación" como resposta unha semana antes.
O SUP reiterou a súa petición de que se dote aos policías tanto de uniforme como de chaleco antibalas de protección individual, co obxectivo que poidan intervir neste tipo de situacións con "a dotación de medios adecuada". Actualmente, denunciou o sindicato, na Comisaría de Santiago só dispoñen dun chaleco antibalas unipersonal 62 dos 222 policías existentes.
PROBLEMAS EN LUGO. Do mesmo xeito, o secretario en Galicia da Unión Federal de Policía (UFP), Miguel González, denunciou que na Comisaría de Lugo, 43 axentes dun persoal de máis de 170 aínda non dispoñen de chalecos antibalas e que ás mulleres fornecéronlles un chaleco masculino. "Hai unha chea de compañeiros que están na rúa e en calquera momento, calquera che dá unha puñalada e déixache no sitio. Desde a UFP dicimos xa abonda, que se gaste o diñeiro na seguridade dos policías e non en bobadas", reivindicou.
No caso das policías femininas, o secretario en Galicia apuntou que dada a "incomodidade" dos chalecos masculinos, moitas policías "entregárono". "Non o queren levar porque, ademais, causa lesións nas costas, porque ao levalo apertado incluso lles apreta o pescozo e van incómodas", puntualizou.
O SUP denuncia que varios dos policías que acudiron ao tiroteo de Santiago non tiñan chaleco antibalas
O sindicato afirma que un dos axentes solicitara un á Dirección Xeral da Policía "de forma expresa", pero lle foi denegado
