Un amplo dispositivo trata de localizar na mañá deste mércores a un coñecido actor galego que permanece fuxido tras, presuntamente, agredir cunha arma branca á súa exparella na sede de Vimianzo do sindicato Unións Agrarias. A tal hora e segundo puido confirmar este xornal, o operativo, formado por varios vehículos e polo menos un helicóptero, estaría intentado dar co paradoiro do intérprete en Camariñas.
Desde primeira hora da mañá, a Garda Civil investiga o suceso como un caso de violencia machista. A vítima, de 48 anos e nai de dous fillos, foi trasladada nun primeiro momento a un centro de atención primaria e, posteriormente, evacuada ao Hospital Clínico de Santiago. Polo momento descoñécese o alcance das súas feridas.
O PRESUNTO AGRESOR. Segundo puido confirmar este diario, o fuxido sería o actor Javier Miñones, coñecido por, entre outros, o seu papel na serie da TVG Serramoura.
CONCENTRACIÓN. O alcalde de Vimianzo, Manuel Antelo, anunciou que esta tarde, ás 20.00 horas, haberá unha concentración en repulsa á agresión.
