A organización descarta aforamento excesivo como causa do suceso do Marisquiño

O director do Marisquiño, Carlos Domínguez, tamén coñecido como Pity, descartou este luns que un excesivo aforamento provocase este domingo o esborralle dunha plataforma da área portuaria de Vigo durante un concerto organizado no marco deste festival causando máis de trescentos feridos.

Domínguez sostivo en declaracións á prensa en Vigo que "en ningún momento" se produciu un exceso de afluencia ao concerto do rapeiro mallorquino Rels B, de entrada libre, e que incluso o domingo foi "o día máis frouxo" en canto a público neste festival de música e deporte celebrado esta fin de semana.

De igual forma, o responsable da organización expresou a súa "gran tristeza" polo sucedido, aínda que se mostrou máis tranquilo polo feito de que os hospitalizados evolucionen "favorablemente" e porque non haxa que lamentar casos máis graves. De todas as maneiras, afirmou que se trata dun "momento moi complicado" e insistiu en que o seu maior desexo é "que a alta de todos estes pacientes se produza o máis axiña posible".

Domínguez non foi capaz de trasladar unha primeira explicación do ocorrido e delegou esta responsabilidade nos equipos técnicos tanto da Autoridade Portuaria como do Concello de Vigo, que nestes momentos traballan en coñecer os pormenores do incidente.

O director do Marisquiño si precisou que contaban con todos os permisos necesarios para a realización deste evento, unha cita habitual no mes de agosto en Vigo, e que neste caso son concedidos pola Autoridade Portuaria.