DMAX estrea o 13 de novembro Yo fui un narco, un documental sobre o narcotraficante galego Laureano Oubiña que reconstrúe a súa historia a partir de testemuños propios e alleos e no que promete falar "alto e claro" por primeira vez en televisión.
"Estiven máis de 22 anos en prisión, pasei por máis de 42 cárceres e eu non matei a ninguén. Durante todos estes anos non puiden falar, pero agora vou falar alto e claro", afirma Laureano Oubiña, en liberdade desde o 2 de setembro, neste documental.
Os días 13 e 14 de novembro, ás 22:30 horas, emitiranse os dous episodios nos que se divide esta produción de Unicorn Content en colaboración con DMAX, que profundará "desde o absoluto rigor e imparcialidade" nos actos dun "dos maiores contrabandistas e narcotraficantes de Galicia" durante décadas.
Englobada no xénero true crime, coa liña editorial de Yo fui un asesino, recompila "todos os datos" e diversos testemuños de persoas que estiveron vinculadas de forma relevante nos feitos, como xornalistas especializados, avogados, testemuñas, fiscais, xuíces e o propio Oubiña.
Entre esas voces testemuñais, destacan Baltasar Garzón, Ricardo Portabales, narco "arrepentido" e testemuña protexida na operación Nécora; Enrique León, excomisario da Policía Nacional, e Vicente Serantes, excontrabandista, entre moitos outros.
"Os espectadores coñecerán, a partir de declaracións do propio Oubiña, a historia do narco español que falará por primeira vez en televisión sobre os seus anos máis prolíferos no negocio do tráfico de drogas, os seus momentos máis críticos, as súas numerosas detencións, xuízos e condenas de cárcere", apunta a nota.
