Os momentos que se viviron este martes a bordo do Boramar foron de auténtico pánico, o que explica que parte da xente optase por tirarse á auga sen sequera pensarllo en canto viu as chamas e a columna de fume. Foi o caso dun grupo de viaxeiros de Lugo que relataban este martes a Faro de Vigo os segundos de pánico vividos. "Houbo unha explosión, empezou a saír fume e chamas e xa comezou a arder todo", un momento no que optou pola vía máis difícil erpo máis rápida. "Eu tireime á auga e logo outra xente xa se foi lanzando tamén".
Foi practicamente o mesmo que fixo unha parella de Asturias, que ían tranquilamente no Boramar cando xusto baixo eles escoitaron unha pequena explosión, aínda que en principio non lle deron moita importancia. "Xusto á beira explotou unha cousa pero saíu unha chama pequena de nada", contaba el. Con todo, "de súpeto" todo o barco estaba xa en chamas. "Foi moi heavy", dixo. A súa compañeira lanzouse ao mar "e logo saltei eu tamén, cando vin que as chamas estaban moi preto".
Prantos e berros foron unha constante nos primeiros momentos, ante a incerteza que rodeaba o suceso. O grovense Arturo Muñiz, unha testemuña do ocorrido recoñeceu vivir un dos "peores momentos" da súa existencia, segundo lle relataba ao Diario de Pontevedra.
Máis ou menos todos os testemuños ían na mesma dirección, como o dunha turista de Majadahonda que se lanzou á auga porque pensaba que ía "morrer queimada". Con todo, o feito de achegarse a unha batea e que a ría estivese chea de barcos de recreo nunha tarde asollada permitiu auxiliar case ao momento aos asustados pasaxeiros.
O patrón do Boramar tratou de achegar o barco ata unha batea para facilitar o desaloxo dos pasaxeiros, pero a situación de pánico que se produciu a bordo fixo que fracasase o seu intento, xa que moitos optaron por botarse á auga ante o temor que sufrir queimaduras. O catamarán golpeou contra unha batea, que sufriu danos de escasa consideración nunha das súas vigas, e acabou a poucos metros da illa da Toxa, na súa cara máis exterior, onde está situado o campo de golf.
Esta incidencia provocou imaxes inéditas, xa que a superficie verde e impoluta sobre a que roda a pelota non tardou en mostrar as pegadas que deixaban os vehículos dos bombeiros e doutros corpos de seguridade que se desprazaron ata o punto onde estaba o barco.
Gran columna de fume
A negra e densa columna de fume procedente deste lugar elevouse no ceo e puido verse non só en municipios próximos ao do Grove, como os de Cambados ou Vilanova de Arousa, senón que tamén era visible noutros que se atopan lonxe da ría de Arousa. A estrada de acceso ao Grove permaneceu cortada polos axentes de Tráfico para facilitar a entrada e a saída da vintena de ambulancias que participou na evacuación dos pasaxeiros feridos no accidente.
