Cinco dos feridos no incendio do catamarán do Grove continúan ingresados

Cinco persoas feridas este martes no incendio dun catamarán turístico no Grove continúan ingresadas en distintos hospitais galegos con queimaduras de diversa consideración. Segundo informou este mércores a Consellería de Sanidade, na unidade de queimados do Complexo Hospitalario Universitario da Coruña permanece estable, con queimaduras graves, o matrimonio de Guadalaxara de 68 e 70 anos que saíu peor parado no suceso. 

Ata este centro desprazouse este mércores pola mañá o conselleiro de Sanidade, Jesús Vázquez Almuiña, para interesarse polo seu estado e mostrar o seu apoio, indican fontes do departamento autonómico. Os outros tres feridos graves están ingresados na clínica Povisa, en Vigo. 

Trátase dunha muller de Sevilla con queimaduras de primeiro e segundo grao, que evoluciona favorablemente e dun matrimonio de Mataró (Barcelona); un home con queimaduras de primeiro e segundo grao e unha muller con queimaduras de segundo grao que non presentan complicacións, segundo indicaron fontes sanitarias.

Os outros 18 pacientes restantes que tiveron que ser atendidos en distintos hospitais galegos xa foron dados de alta. Ademais, o resto de feridos, 15, foron atendidos na PAC do Grove e no propio lugar do accidente sen que fose necesario o seu traslado a centros médicos. 

O incendio da embarcación turística, da que aínda se descoñece con seguridade a súa causa e que a deixou completamente calcinada, deixou 38 persoas feridas das 52 que ían a bordo, entre turistas (48) e tripulación (4).

ulación (4).