O PP rexeitou unha iniciativa presentada no Concello de Esgos para retirar o cargo honorífico de fillo predilecto dese municipio ourensán ao expresidente da Deputación provincial José Luis Baltar Pumar, condenado por prevaricación.
A iniciativa foi exposta por un concelleiro socialista, o único que non é do PP no citado Concello, como parte dunha postura do PSOE a favor de retirar todos aqueles símbolos ou denominacións de espazos e lugares públicos en honra a cargos electos condenados por sentenza firme.
A Audiencia provincial de Ourense confirmou hai catro anos unha condena de nove anos de inhabilitación especial para emprego ou cargo público a Baltar por un delito continuado de prevaricación por contratar de xeito irregular a máis dun centenar de empregados da Deputación.
En declaracións a Efe, o concelleiro socialista Víctor Pérez criticou que este Concello ourensán, que ten oito concelleiros do PP, entre eles Manuel Baltar, fillo de José Luis Baltar, siga mantendo desde 1997 ese título de fillo predilecto ao expresidente da Deputación.
"Se Esgos ten un condenado en firme como fillo predilecto, con rúa dedicada, é responsabilidade do PP", sinalou Pérez, e acusou a Baltar de demostrar "unha vez máis que non lle importan absolutamente nada os seus veciños".
A moción presentada polo PSOE instaba a retirar honras a persoas condenados por sentenza firme nese municipio, do mesmo xeito que fixo esa formación na Deputación provincial, onde a súa iniciativa tamén foi rexeitada.
Nun comunicado, Pérez lamentou que o PP "non foi capaz de dar ningún argumento coherente que xustifique este voto en contra" da proposta e reprochou que Esgos continúe mantendo o tributo a unha persoa condenada polas autoridades xudiciais. Nese sentido, reiterou o "compromiso firme" do PSOE "contra a corrupción, o caciquismo e a arbitrariedade".
