O PPdeG non dará a coñecer ata este martes, tras unha reunión antes do comezo do pleno do Parlamento, a súa posición sobre se a valedora do Pobo, Milagros Otero, debe seguir ou non á fronte do alto comisionado da Cámara autonómica, logo da sentenza do Tribunal Superior de Xustiza de Galicia (TSXG) que anulou un nomeamento tras detectar "desvío de poder" nun proceso de selección interno.
Respecto diso, o portavoz parlamentario dos populares galegos, Pedro Puy, remitiuse este luns en rolda de prensa ás "explicacións" que deu Otero na comisión de peticións a semana pasada, así como ás alegacións que debe rexistrar esta mesma xornada no Pazo do Hórreo.
O seu grupo, o maioritario, está "pendente" destas alegacións, segundo apuntou Puy, e a partir desta información e a "explicación" e outra documentación achegada "tomará unha posición" na reunión previa ao pleno.
Toda a oposición (En Marea, PSdeG e BNG) pide a marcha de Otero, tras a anulación do nomeamento da filla do mentor universitario de Otero e irmá do portavoz parlamentario do PPdeG, o propio Pedro Puy, quen este luns rexeitou adiantar calquera información achega do posicionamento.
Na súa comparecencia en comisión, a valedora negou que vaia dimitir e desvinculouse do proceso de selección alegando que se inhibiu. Así as cousas, a última palabra tena o Parlamento e, en concreto, o PPdeG, xa que é necesario unha maioría cualificada de tres quintos da Cámara (45 deputados) para confirmar o seu cesamento.
AP-9, AVE E MEIRÁS. Sobre outros asuntos da orde do día do pleno, Pedro Puy destacou que "nesta ocasión" ve "máis posibilidades" de que a tramitación da iniciativa para pedir o traspaso da autoestrada AP-9 "culmine en éxito", tras a sentenza do Tribunal Constitucional sobre a capacidade da Mesa para emitir vetos.
Con todo, mostrouse "sorprendido" por que algúns grupos se desmarquen" agora "pedindo cuestiones" que con anterioridade non se solicitaron.
En canto ás obras da alta velocidade a Galicia, defendeu que o seu grupo manterá "a coherencia" reclamando ao novo Goberno central "que manteña os compromisos" existentes ata agora, e que fixan para finais de 2019 a chegada do Ave en período de probas.
Para rematar, sobre o Pazo de Meirás, confiou en que se produza un "consenso", aínda á espera dalgunhas emendas que non foron rexistradas. Ao seu xuízo, segundo subliñou, "hai que facer as xestións que recomenda o comité de expertos", coa vista posta na incorporación ao patrimonio público deste ben.
